Anima Exhibitions-ը ներկայացնում է նոր ցուցադրություն։

Հունվարի 9-ից մինչև ապրիլի 2-ը «Հայաստանի նկարիչների միություն»-ում հայազգի հանճարեղ ծովանկարիչ Հովհաննես Այվազովսկու ստեղծագործությունները կկենդանանան լույսի, ձայնի և շարժման միջոցով։ Այցելուներին սպասվում է ոչ միայն ծանոթություն կտավների հետ, այլև դրանց ստեղծման պատմությունների և հեղինակի կենսագրության բացահայտում։

Այվազովսկու հսկայական ստեղծագործական էներգիայի մասին է խոսում այն իրողությունը, որ Այվազովսկին ստեղծել Է շուրջ 6000 կտավ։ Աշխատել է շատ արագ, տեսողական վիթխարի հիշողությամբ։ Պատկերել է ծովը՝ օրվա տարբեր ժամերին, տարվա բոլոր եղանակներին։ Խորապես զգացել և վերարտադրել է ծովային տարերքի անընդգրկելի վեհությունը, հրավառ արևածագն ու արևամուտը, կեսօրյա անդորրը, ալիքների ռիթմն ու նրանց վրա խայտացող լուսնի լույսը։ Նրա պատկերները երբեմն նուրբ քնարական են, երբեմն՝ պաթետիկ։ Այվազովսկու գործերը աճուրդով վաճառվել են մինչև $2 միլիոն 125 հազար ամերիկյան դոլարով։

Ինչպես Վան Գոգի և Կլիմտի կտավների անիմացիոն ցուցահանդեսի ժամանակ, այս անգամ ևս լինելու են բացառիկ տեխնիկական լուծումներ՝ 510քմ ցուցասրահ, 4 մետր բարձրությամբ առաստաղ, ավելի քան 300 կտավների անիմացիա և
43 րոպե տևողությամբ ամբողջական ծրագիր։

Մեծ էկրաններն ու տիեզերական ձայնային համակարգը թույլ են տալիս ավելի խորությամբ ընկալել արվեստագետի պատկերային աշխարհը, խորասուզվել ծովի ալիքների մեջ ու զգալ քեզ «ներսում» այնպիսի գործերի,
ինչպիսիք են աշխարհահռչակ «Իններորդ ալիք», «Ալիքների մեջ», «Նավարինի ծովամարտը» կտավները։

Ցուցահանդեսը բաց է ամեն օր՝ 11։00-21։00, Աբովյան 16 հասցեում՝ «Հայաստանի նկարիչների միություն»-ում։